ڕێكخراوی لێبوردنی نێوده‌وڵه‌تی ڕۆژی چوارشه‌ممه ٢ی جۆزه‌ردان له به‌یاننامه‌یه‌كدا ئاماژه‌ی به ئه‌گه‌ری له‌سێداره‌دانی ١٥ به‌ندكراوی بزووتنه‌وه‌ی ژن،ژیان،ئازادی كرد و خوازیاری هه‌ڵوه‌شاندنه‌وه‌ی حوكمه‌كانیان بوو.
ئه‌و ڕێكخراوه‌یه له نامه‌یه‌كدا ڕوو له موحسنی ئێژه‌یی سه‌رۆكی ده‌زگای قه‌زایی كۆماری ئیسلامی وتوویه، له‌و ١٥ كه‌سه ٨ كه‌سیان مه‌ترسی له‌سێداره‌دانیان له‌سه‌ره. به‌رپرسانی كۆماری ئیسلامی ئه‌و ١٥ به‌ندكراوه‌یان له محاكمه‌ی دادپه‌روه‌رانه بێبه‌ش و هه‌موو مافه‌كانیان لێ زه‌وت كردوون. هه‌روه‌ها له ماوه‌ی به‌ندكران دا به وه‌حشیانه ترین شێوه ئازاری جه‌سته‌یی و جنسی دراون و به‌شێكیان ناچار به دانپێدانانی زۆره‌ملێ كراون. ڕێكخراوی لێبوردنی نێوده‌وڵه‌تی خوازیاری هه‌ڵوه‌شاندنه‌وی حوكمی ئێعدامی ئه‌و ١٥ كه‌سه، ده‌ستڕاگه‌یشتنیان به‌پارێزه‌ری سه‌ربه‌خۆ و دادگایی كردنی دادپه‌رورانه‌یان بوو.
