له ڕۆژانی ڕابردوودا، دوو ژنی گه‌نج به ناوه‌كانی “گوڵناز“، تهمهن ٢٧ ساڵ و خه‌ڵكی ماهیده‌شتی كرماشان، هه‌روه‌ها “عاتفه زۆغه‌یبی” تهمهن ١٧ ساڵ و خه‌ڵكی شووشته‌ر له‌لایه‌ن بنه‌ماڵه‌كانیانه‌وه به شێوه‌یه‌كی وه‌حشیانه كوژراون.
به‌پێی ڕاپۆرتی ڕێكخراوه‌كانی مافی مرۆڤ، ژنێكی گه‌نجی دووگیان له ماهیدشت به ناوی گوڵناز، له‌لایه‌ن باوك و براكه‌یه‌وه به چه‌ك بریندار و پاش ٢١ ڕۆژ مانه‌وه له كۆما گیانی له‌ده‌ست داوه و منداڵه‌كه‌ی له‌بار چووه. له‌لایه‌كی دیكه‌وه، به‌یانی چوارشه‌ممه ١٠ی ڕێبه‌ندان، ژنێكی تهمهن ١٧ ساڵ به ناوی “عاتفه زۆغه‌یبی” خه‌ڵكی شووشته‌ر، هاوڕێ له‌گه‌ڵ منداڵه‌كه‌ی به ١٦ فیشه‌ك له‌لایه‌ن باوك و براكه‌یه‌وه كوژراوه. به وته‌ی چالاكانی مافی ژن، عاتفه پێشتر په‌یوه‌ندی سۆزداری له‌گه‌ڵ كوڕێك دا بووه و هه‌ڵهاتووه. ساڵی ڕابردوو بنه‌ماڵه‌ی كوڕه‌كه كه عه‌شیره‌یه‌كی گه‌وره‌ی شووشته‌ر بوون ده‌چنه خوازبێنی و به په‌رداختی ٦٠٠ ملیۆن تمه‌ن باوك و برای قوربانی ڕازی ده‌كه‌ن تاكوو واز له كوشتنی بێنن، به‌ڵام به‌یانی چوارشه‌ممه بنه‌ماڵه‌كه‌ی به چه‌ك ده‌یكوژن.
