ڕاپۆرتە گەیشتووەکان له شارەکانی ئیلام و کرماشان ئاماژە بەوە دەکەن کە هێزە ئەمنییەکانی کۆماری ئیسلامی، بە تاڵانبردنی کۆگای کۆمپانیاکانی بڵاوکردنەوەی دەرمان، ڕێگری لە دەستڕاگەییشتنی هاوڵاتییان، بەتایبەت بریندارانی خۆپێشاندانەکان و نەخۆشانی خاوەن باری تەندروستیی ناجێگیر، بۆ پێداویستییە پزیشکییە سەرەکییەکان دەکەن.
ئەم کارە کە نموونەیەکی زەقی پێشێلکردنی مافی ژیان و تەندروستییە، نیگەرانییەکی قووڵی لەسەر ئاستی نێودەوڵەتی لێکەوتووەتەوە. بەرپرسانی ئەم کۆمپانیایانە پشتڕاستیان کردووەتەوە کە هێزە حکوومییەکان پێش ڕادەستکردن، تەواوی دەرمانی کۆگاکانیان دەستبەسەردا گرتووە و بۆ شوێنێکی نادیاریان گواستووەتەوە. شایانی باسه بێبەشکردنی بە ئەنقەستی خەڵکی سڤیل لە چاودێریی پزیشکی و دەرمانە زۆر پێویستەکان، بەپێی کۆنڤانسیۆنە نێودەوڵەتییەکان و جاڕنامەی مافی مرۆڤ، کارێکی نایاسایی و نامرۆڤانەیە. ئەم دۆخە لە کاتێکدایە کە زۆرێک لە نەخۆشانی تایبه‌ت لە نەخۆشخانەکانی ناوچە بێبەشکراوەکان، بەهۆی نەبوونی دەرمانی سەرەتاییەوە لەگەڵ مەترسیی مردن بەرەوڕوون.