ڕۆژی ڕابردوو، وڵاتانی ئەندام لە ئەنجومەنی هاوکاری کەنداو و عەرەبستانی سعوودی لە دوو بەیاننامەی جیاوازدا، هێرشە مووشەکییەکانی ڕژیمی کۆماری ئیسلامییان بۆ سەر وڵاتانی ناوچەکە بە توندی ئیدانە کرد.
ئەنجومەنی هاوکاری کەنداو لە بەیاننامەیەکدا جەختی لەسەر مافی بەرگریی ڕەوا کردووەتەوە و ڕایگەیاندووە کە ئاسایشی وڵاتانی ئەندام یەکپارچەیە و هەر جۆرە هێرشێک بۆ سەر یەکێکیان، وەک هێرش بۆ سەر هەموویان هەژمار دەکرێت. لە لایەکی دیکەوە، وەزارەتی دەرەوەی عەرەبستانی سعوودی هێرشەکانی ئەم دواییەی کۆماری ئیسلامی بۆ سەر کووەیت، بەحرەین و ئوردۆن بەتوندی شەرمەزار کرد و بە پێشێلکردنی سەروەریی ئەو وڵاتانەی ناوبرد. لە بەیاننامەکاندا ئاماژە بەوە کاوە کە ڕیاز ئەم کردەوانەی بە هەڕەشەیەکی جددی بۆ سەر ئاسایش و سەقامگیریی ناوچەکە و پێشێلکاریی بڕیارنامەی ژمارە ٢٨١٧ی ئەنجومەنی ئاسایشی نەتەوە یەکگرتووەکان لە ساڵی ٢٠٢٦ زانیوە، کە بۆ ڕاگرتنی دەستبەجێی هێرشەکانی ئێران دەرچووە.