مای ساتۆ، ڕاپۆرتنێری تایبەتی نەتەوە یەکگرتووەکان بۆ کاروباری مافی مرۆڤ لە ئێران، نیگەرانیی قووڵی خۆی سەبارەت بە پەرەسەندنی ململانییەکانی نێوان ئەمریکا و ڕژیمی دیکتاتۆریی کۆماری ئیسلامی دەربڕی و هۆشداری دا کە خەڵکی ئێران جارێکی دیکە کەوتوونەتە نێوان هێرشی سەربازی لە دەرەوە و سەرکوتی ناوخۆییەوە.
بەپێی ڕاپۆرتەکان، مای ساتۆ لە پەیامێکدا جەختی لەو سەر ئەوە کردووەتەوە کە بەردەوامیی سەرکوتەکان، زیادبوونی ڕێژەی لەسێدارەدان و وێرانبوونی ژێرخانە مەدەنییەکان، بارودۆخی ژیانی خەڵکی زۆر سەختتر کردووە. ناوبراو ئاماژەی بەوە کردووە کە زیانگەیشتن بە لەنگەرگەکانی باشووری ئێران، هێڵەکانی ئاسن و دامەزراوەکانی وزە، گوشارە ئابوورییەکانی بۆ سەر خەڵک چەند هێندە دەکات. ئەم بەرپرسەی نەتەوە یەکگرتووەکان داوای کەمکردنەوەی گرژییەکان و پاراستنی گیانی هاووڵاتییانی مەدەنی کردووە و هۆشداری داوە کە هەر جۆرە ڕێککەوتنێکی سیاسی بەبێ لەبەرچاوگرتنی مافەکانی مرۆڤ و داواکارییەکانی خەڵکی ئێران، ناتوانێت وەڵامدەرەوەی قەیرانەکانی ئەو وڵاتە بێت.
