له ڕۆژانی ڕابردوودا، له شاری ڕاماتیوولی فه‌ڕانسه، ئه‌نجوومه‌نی لووكرایۆل كه له بواری ئازادی ڕاده‌ربڕین دا چالاكه، پیشانگایه‌كی به مه‌زموونی خه‌باتی ئێرانیان بۆ گه‌یشتن به ئازادی كرده‌وه و له‌و پێشانگایه دا، ڕێز له كار و چالاكییه‌كانی نه‌رگس محه‌ممه‌دی، براوه‌ی خه‌ڵاتی ئاشتی نۆبێل گیرا.
له‌و پێشانگایه ده‌یان كاری هونه‌ری و كاریكاتۆر به مه‌زموونی خه‌باتی خه‌ڵكی ئێران بۆ گه‌یشتن به ئازادی پیشانی خه‌ڵك و چالاكانی سیاسی و مافی مرۆڤ دراوه. هه‌روه‌ها چه‌ندین بابه‌ت شێعر له به‌ندكراوانی ژن له زیندانه‌كانی ئێران خوێندراوه‌ته‌وه و له‌لایه‌ن به‌شداربووانه‌وه پێشوازی لێ كراوه. له كۆتایی ئه‌و چالاكییه دا، شیرین ئه‌رده‌كانی، پارێزه‌ری بونیادی نه‌رگس محه‌ممه‌دی، خوازیاری ئازادی هه‌موو به‌ندكراوانی سیاسی، ده‌ستڕاگه‌یشتنی به‌ندكراوانی نه‌خۆش به ده‌رمان و هه‌ڵوه‌شاندنه‌وه‌ی سزای سێداره بوو.
