نوێنه‌رانی مه‌جلیسی كۆنه‌په‌ره‌ستی ئیسلامی، ڕۆژی دووشه‌ممه ٥ی سه‌رماوه‌ز ڕایانگه‌یاند كه ٢٠٪ به حه‌قده‌ستی خانه‌نشینكراوان ئیزافه كراوه و به‌و جۆره لانیكه‌می حه‌قده‌سته‌كانیان گه‌یشتووه‌ته ١٢ ملیۆن تمه‌ن.
له به‌رانبه‌ر زیادكردنی ٢٠ له سه‌دی حه‌قده‌ست، خانه‌نشینكراوان بانگه‌وازیان بۆ كۆبوونه‌وه‌ی سه‌راسه‌ری بڵاو كردووه‌ته‌وه و ڕایانگه‌یاندووه كه حكوومه‌تی گه‌نده‌ڵی كۆماری ئیسلامی گاڵته‌یان پێ ده‌كات. هێڵی هه‌ژاری ٣٠ ملیۆن تمه‌نه و به‌رپرسانی حكوومه‌ت ته‌نیا ٢٠٪یان به حه‌قده‌سته‌كانیان ئیزافه كردووه و به‌كرده‌وه‌ده‌رهاتنی گه‌ڵاڵه‌ی هاوسانسازیشیان به هاتنی ساڵی تازه گرێ داوه. چوونه‌سه‌ره‌وه‌ی ٢٠ له سه‌دی حه‌قده‌ست له حاڵێكدایه كه ڕێژه‌ی هه‌ڵاوسان به‌رده‌وام له زیادبووندایه و خه‌ڵك توانای دابینكردنی سه‌ره‌كی ترین پێداویستیه‌كانیشی نه‌ماوه.
