کۆمەڵێک لە هەواڵنێرانی تایبەتی نەتەوە یەکگرتووەکان، لەوانە “مای ساتۆ“، هێرشە سەربازییەکانی ویلایەتە یەکگرتووەکانی ئەمریکا و ئیسرائیلیان بۆ سەر ئێران بە نایاسایی ناو برد و هاوکات نیگەرانیی خۆیان سەبارەت بە دۆخی خراپی مافەکانی مرۆڤ لە ئێران دەربڕی.
هەواڵنێری تایبەتی مافەکانی مرۆڤی نەتەوە یەکگرتووەکان لە کاروباری ئێران، لەم بارەیەوە وتی: “دەکرێت لە یەک کاتدا هەردوو ڕاستییەکە بناسین، ئەم هێرشانە نایاسایین و لە هەمان کاتدا دۆخی مافەکانی مرۆڤ لە ئێران بەتەواوی جێگای نیگەرانییە.” ئەو وێڕای ئاماژە بە لێکەوتە مرۆییەکانی ئەم هێرشانە وتیی: لە ئەنجامی هێرش بۆ سەر قوتابخانەیەکی سەرەتایی لە میناب لە پارێزگای هورموزگان، زیاتر لە ١٦٠ قوتابی کچ گیانیان لەدەستداوە. هەروەها نەخۆشخانەکان و ناوچە قەرەباڵغەکانیش کراونەتە ئامانج. ئەو لە درێژەدا سەبارەت بە دۆخی زیندانییەکانیش هۆشداری دا و وتی ڕاپۆرتی زۆر نیگەرانکەری پێگەیشتووە کە نیشان دەدەن هەندێک لە بەندەکانی زیندان لە دۆخی قەرەنتینە یان داخراندان.
