بەپێی ڕاپۆرتی گەیشتوو، وەزارەتی دەرەوەی ئەمریکا بەیاننامەیەکی هاوبەشی لەگەڵ وەزیرانی دەرەوەی وڵاتانی ئەنجومەنی هاوکاریی کەنداو بڵاو کردەوە، کە تێیدا جەخت لەسەر گرنگی چارەسەرکردنی پرسی مووشەکە بالیستییەکانی کۆماری ئیسلامی و کاریگەرییەکانی لەسەر ئاسایشی ناوچەکە کراوەتەوە.
ئەم بەیاننامەیە پاش کۆبوونەوەیەک لە مەنامە، پایتەختی بەحرەین، بڵاو کراوەتەوە، کۆبوونەوەکە بە سەرۆکایەتی وەزیری دەرەوەی ئەمریکا و بەشداربوونی وەزیرانی دەرەوەی وڵاتانی ئەنجومەنی هاوکاریی کەنداو ئەنجام درا. لە بەشی پەیوەندیدار بە ئێراندا، بەیاننامەکە پێشوازی لە یادداشتنامەی لێکتێگەیشتنی نێوان ئەمریکا و کۆماری ئیسلامی کردووە و جەختی لەسەر بەردەوامبوونی هەوڵە دیپلۆماسییەکان بۆ کەمکردنەوەی گرژییەکان و ڕێگری لە دەستکەوتنی چەکی ئەتۆمی لەلایەن کۆماری ئیسلامی کردووەتەوە.