شارەزایەکی ئەمنی لە ئەوروپا هۆشداری دا لە زیادبوون و پەرەسەندنی ئەو هێرشانەی کە دەدرێنە پاڵ گروپە سەر بە کۆماری ئیسلامی و ڕایگەیاندووە کە ئەم هەڕەشانە دەکرێت بۆ وڵاتانی تریش پەرە بستێنێت.
مامۆستایەکی زانستە ئەمنییەکان لە “کینگز کۆلێژ“ی لەندەن، لە کاردانەوەیەکدا بەرامبەر بە هۆشداریی دەزگا ئەمنییەکانی ئووروپا ڕایگەیاند: شێوازی ئەو هێرشانەی کە دەدرێنە پاڵ گروپی “حرکت اصحاب الیمین الاسلامیه” لەگەڵ شێوازە ناسراوەکانی سپای پاسداران یەکدەگرێتەوە. ئەو هۆشداریی دا کە ئەگەر گوشارەکان بۆ سەر تاران زیاد بکەن، ئەگەری پەرەسەندنی ئەم جۆرە هێرشانە بۆ وڵاتانی تری وەک ئەڵمانیاش هەیە. هاوکات، لێکۆڵینەوەکان لە بەریتانیا و فەرەنسا نیشانی دەدەن کە هێرشەکانی ئەم دواییەی سەر ئامانجە جوولەکەکان، ئیسرائیلییەکان، ئەمریکییەکان و هەروەها نەیارانی کۆماری ئیسلامی لە چەند وڵاتێکی ئوروپایی، لە چوارچێوەی هەڕەشە پەیوەندیدارەکان بە ئێرانەوە لێکۆڵینەوەیان لێ دەکرێت.
