ڕۆژی هەینی ٢٩ی جۆزەردانی ١٤٠٥ی هەتاوی، تێگەیشتننامەی کۆتایی شەڕ لەنێوان کۆماری ئیسلامی و ئەمریکا لە شوێنی بورگن شتاکی نزیک شاری لوسێرن لە سوئیس واژۆ دەکرێت.
بەپێی دوایین زانیارییەکان، ئەو شوێنە بە هۆی هەڵکەوتەی جوگرافی و سنوورداربوونی دەستڕاگەیشتن، بۆ دابینکردنی ئاسایشی واژۆکردنی تێگەیشتننامەکە هەڵبژێردراوە. هەروەها وەزارەتی دەرەوەی سوئیس ڕایگەیاندووە کە هەڵبژاردنی بورگن شتاک بە پێشنیاری ناوبژیوانانی قەتەر و پاکستان و بە ڕەزامەندی هەردوو لایەن ئەنجام دراوە. بەپێی ناوەڕۆکی تێگەیشتننامەکە، کۆماری ئیسلامی، ئەمریکا و هاوپەیمانەکانیان پابەند دەبن بە کۆتایی هێنان بە هەموو کردارە سەربازییەکان لە ناوچە جیاوازەکان، لەوانەش لوبنان. هەروەها دەستپێکردنی هەنگاوەکانی هەڵگرتنی گەمارۆی دەریایی ئێران، دڵنیابوون لە تێپەڕینی ئاسایی کەشتی بازرگانی و نەوتهەڵگرەکان لە گەرووی هورموز، هەڵگرتنی سزا ئابوورییەکان، زیادکردنی هەناردەی نەوت و ئازادکردنی داراییە بلوکەکراوەکانی کۆماری ئیسلامی لە ناو ئەو تێگەیشتننامەیەدا هاتووە. شایانی باسە کە دیاریکردنی چارەنووسی پاشماوەکانی ئۆرانیۆمی دەوڵەمەندکراو و هەندێک بابەتی پەیوەندیدار بە بەرنامەی ناوکی ئێران، بۆ وتووێژەکانی داهاتوو دواخراون.
