بەردەوامیی دەستبەسەربوون و ناڕوونیی چارەنووسی عادڵ پیرۆزی، هاووڵاتیی خەڵکی مەریوان
16:48 – 17 December 2023
هەنگاو: یەکشەممە، ٢٦ی سەرماوەزی ٢٧٢٣
هاووڵاتییەکی خەڵکی شاری مەریوان بە ناوی عادڵ پیرۆزی و بەندکراوی سیاسیی پێشووی، نزیکەی مانگێکە لەلایەن هێزە ئەمنییەکانی ئێران لەو شارە دەستبەسەر کراوە و هێشتا هیچ زانیارییەکی ورد و دروست لەسەر چارەنووسی ناوبراو لە بەردەستدا نییە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو؛ عادڵ پیرۆزی، تەمەن ٢٨ ساڵ، بەندکراوی سیاسیی پێشوو و خەڵکی گوندی "سەردۆش"ی سەر بە شاری مەریوان، ماوەی ٢٧ ڕۆژە لەلایەن هێزەکانی وەزارەتی ئیتلاعاتەوە لەو شارە دەستبەسەر کراوە و تا هەنووکە بە هیچ شێوەیەک مافی چاوپێکەوتن و پەیوەندیی تەلەفۆنی لەگەڵ بنەماڵەکەی پێ نەدراوە.
بەگوێرەی زانیاریی سەرچاوە ئاگادارەکان، لە ماوەی ڕابردوودا جگە لەوەی کە چاوپێکەوتن و پەیوەندیی تەلەفۆنی لێی قەدەغە کراوە، وەزارەتی ئیتلاعاتی کۆماری ئیسلامیی ئێران لە مافی دەستپێڕاگەیشتن بە پارێزەریش بێبەری و بێبەشی کردووە.
ناوبراو ڕۆژی دووشەممە، ٢٩ی خەزەڵوەری ٢٧٢٣ (٢٠ی نۆڤەمبەری ٢٠٢٣)، لەلایەن هێزەکانی ئیدارەی ئیتلاعاتی شاری مەریوان بانگ و پاش سەردانی بۆ ئەو ناوەندە حکوومەتییەن، دەستبەجێ دەستبەسەر کراوە.
شایانی باسە کە عادڵ پیرۆزی لە پاییزی ساڵی ٢٧١٨ جارێکی دیکە لەلایەن هێزە ئەمنییەکانەوە دەستبەسەر کراوە و دواتر لەلایەن دادگای شۆڕشی مەریوانەوە بە تۆمەتی هاوکاری لەگەڵ حیزبێکی کوردستانی، سزای ٢ ساڵ بەندکردنی بەسەردا سەپاندووە.
ئەو هاووڵاتییە لە پاییزی ساڵی ٢٧١٩دا، دوای تێپەڕاندنی ٦ مانگ لە سزای دوو ساڵی بەندکرانەکەی، ڕۆژی ٦ی پووشپەڕی ٢٧١٩ لە بەندیخانەی ناوەندیی مەریوان ئازاد کرا.
