ک.م.م.ک:
بەپێی هەواڵی گەیشتوو بە ناوەندی هەواڵی KMMK، هێزە ئەمنییەکانی ڕژێمی ئێران مێرمنداڵێکی تەمەن ١٦ ساڵانیان بە ناوی محەممەد مەحموودی دەستبەسەر و بۆ دەسبەسەرگەی ئەمنی گواستووەتەوە.
شایانی باسە کە، دەستبەسەر کردنی ئەم منداڵە جوانڕۆییه بۆ دەربڕینی خۆشحاڵی دوای دۆڕانی تیمی ڕژێمی ئێران لە یاری تۆپی پێ، بەرامبەر وڵاتی قەتەر، لە جامی گەلانی ئاسیادا، دەگەڕێتەوە.
نەتەوە چەوساوەکان و تەنانەت زۆرێک لە دانیشتووانی ناوەندیی جوگرافیای سیاسی ئێران، پاش هەڵوێستی دژه‌خەڵکیی تیمی تۆپی پێی هەڵبژێردراوی ڕژێم لە سەردەمی ڕاپەڕینی ژن ژیان ئازادی، ڕق و بێزاری خۆیان لە تۆپی پێی بەناو نەتەوەیی ئێران دەربڕیوە. ئەم بێزارییە بە تایبەت لە کاتی یارییەکەی تیمی ناوبراو بەرامبەر به قەتەر و شکستی تیمی ئێران، گەیشتە لووتکه.
پێویستە ئاماژە بەوە بکرێت کە شاری جوانڕۆ، لە سەردەمی شۆڕشی ژن ژیان ئازادیدا، زۆرترین بەرخۆدانی هەبووە، کە لە ئەنجامدا دڕندانەترین سەرکوتی لێکەوتەوە و ژمارەیەکی زۆر لە هاووڵاتییانی ئەم شارە بە دەستی هێزە سەرکوتگەرەکانی ڕژیم کوژران و لە ڕێگای ئازادیدا گیانیان بەخت کرد.
خ.ع
