ک.م.م.ک:
بەگوێرەی ڕاپۆرتی هەواڵدەریی کۆمەڵەی مافی مرۆڤی کوردستان، دوای تێپەڕبوونی هەفتەیەک بەسەر دەسبەسەرکردنی کەمال مەسعوودی، تا ئێستا هیچ زانیارییەک لە بارەی بارودۆخ و شوێنی ڕاگیرانی ناوبراو لەبەردەستدا نییە.
کەمال مەسعوودی، چالاکی مەدەنی، لە ٢٤ی سەرماوەزی ئەمساڵ، لە کاتی شەپۆلی بەربڵاوی دەستبەسەرکردنی چالاکانی مەدەنی و سیاسیی کورد لە شاری مەهاباد، لەگەڵ چەند هاووڵاتییەکی دیکە، لە لایەن هێزە ئەمنییەکانی شاری مەهابادەوە دەستبەسەر کرا.
بەپێی زانیارییەکان، هێزە ئەمنییەکان لەکاتی دەسبەسەرکردنی مەسعودی، بە توندی لێیانداوە و ماڵەکەیان پشکنیوه.
سەرچاوە خۆجێییەکان ڕایانگەیاندووە کە، مەسعوودی بۆ شوێنێکی نادیار لە ورمێ گوازراوەتەوە. بەڵام سەرەڕای بەدواداچوونی بەردەوامی خێزانەکەی، تا ئێستا هیچ زانیارییەک سەبارەت بە بارودۆخی ناوبراو و شوێنی راگرتنی بەدەست نەهاتووه.
خ.ع