ک.م.م.ک:
ڕۆژی چوارشەممە، ١٢ی گوڵانی ٢٧٢٤، هاووڵاتییەک بە ناسنامەی وەحید میردریکوەند، کوڕی سەعید خەڵکی شاری خوڕەماوا، بە دەستی هێزی پۆلیسی ئینتزامی ڕێژیمی ئێرانەوە کوژرا.
جێی ئاماژەیه، ئەم هاووڵاتییە نەخۆش و لە بارودۆخێکی نائاساییدا بووە، کە بە مەبەستی چارەسەری دەڕوات بۆ نەخۆشخانەی شەهید ڕەحیمی. پاشان گرنگینەدان بە چارەسەری کێشەی ناوبراو لە لایەن پزیشکان و کارمەندانی پزیشکی ئەو نەخۆشخانە، دەربڕینی ناڕەزایەتی ئەم هاووڵاتییەی لێدەکەوێتەوە.
سەرچاوەیەکی ئاگادار ڕایگەیاند، که دوای ناڕەزایەتی ئەم هاووڵاتییه، پێی وتراوە کە رێگای پێنادرێ بڕواتە لای دوکتور، ئەمەش بووه هۆی پەرەسەندنی ناڕەزایەتییەکەی و لە ئەنجامدا بە دەستێوەردانی هێزی پۆلیس و سەرکوتکردن و لێدان بە مشت و باتۆم، سەری بەر لێدان دەکەوێت و مێشکی دەوەستێت و لە کۆتاییدا گیانی لە دەست دەدا.
شایانی باسه کە بنەماڵەی ئەم هاووڵاتییە، لەلایەن دەزگا ئەمنییەکانەوە هەڕەشەیان لێدەکرێت و لەئەنجامی ئەو هەڕەشانەشدا، مردنەکەیان بە خۆکوشتن ڕاگەیاندووە.
خ.ع
